Category: Tíðindi

Dystarfrásøgn: Tóku ikki av møguleikanum

Undan grannauppgerðini ímóti NSÍ, lá B68 tvey stig frammanfyri grannarnar, og B68 kundu tí við einum sigri leggja seg 5 stig framum. Hóast talan var um ein javnan dyst, við góðum málkjansum báðar vegir, var B68 kortini greitt omaná, tá talan var um teir heilt stóru málkjansirnar, og B68 átti tí at havt vunnið dystin, sum tó endaði við javnleiki 1-1, eftir at støðan var 0-0 í hálvleikinum.

B68 dagur var á skránni á Svangaskarði, og tað vóru eisini nógvir áskoðarar, tá Petur Reinert bríkslaði dystin í gongd. Nakað av vindi var, har B68 hevði undanvind í fyrra hálvleiki. Petur í Túni Petersen var við aftur eftir leikbann, meðan Johnleif Højgaard fekk teir seinastu minuttirnar, eftir at hann ikki verið við síðani triðja umfar.

Samanumtikið var talan um ein javnan dyst, har leikferðin var høg, og har liðini skiftust um at hava góðar periodir við góðum málkjansum. Talan var ikki um ein hart leiktan dyst, tí einki kort varð givið. B68 rakti tríggjar ferðir yvirliggjaran, einar tríggjar ferðir var B68 leikari mest sum leysur í brotsteginum, uttan at tað gav úrslit. B68 hevði eisini fleiri góðar støður eftir deyðbóltar, men altíð var eitt NSÍ bein í vegin. NSÍ hevði eisini sínar kjansir, har sera vandamikli Jann Benjaminsen rakti stongina við góðum skoti útifrá, umframt at teir eisini rakti yvirliggjaran, tá ein B68 leikari skuldi skjóta bóltin burtur, men rakti bóltin so mikið illa.

Málini komu eftir stutt millumbil í seinna hálvleiki, har tað var B68, sum legði seg á odda. B68 leikararnir vóru til tíðir raskir at stressa NSÍ verjuni at gera mistøk, og tað gav eisini úrslit tá eitt korter var leikt av seinna hálvleiki. Ein B68 leikari vinnur bóltin frá einum NSÍ’ara, sendir ein eyðsýndan Óla Højgaard Olsen avstað, og við einari góðari sending tvørturum, finnur hann Svein Justinussen, sum skorar til 1-0. NSÍ svarar aftur 5 minuttir seinni, tá B68 missa bóltin í uppspælinum, har tað gongur skjótt hinvegin, og teir fáa eitt horna. Hornað verður sent væl innfyri, har ein púra fríur Atli Petersen stútar bóltin í málið til 1-1.

Eftir dystin vóru B68 leikararnir eisini vónbrotnir, og tað hava teir eisini allan rætt til, tí eydnan var ikki veruliga við teimum.

Komandi umfar verður leikt mikudagin, tá Giza/Hoyvík vitjar á Svangaskarði.

Hagtøl frá dystinum kunnu síggjast við at trýsta á slóðina niðanfyri.

http://www.faroesoccer.com/match.php?matchID=18467&pid=50

Koyr á B68

Her vinna okkara menn 3-0 á næstbesta liðinum hjá TB/FCS/ROYN

Hósdagin 13. septembur, kl. 19.30 verður eykaaðaðlfundur á Svangaskarði.

Bert eitt punkt er á skránni, og tað er væl av nevndarlimum. Rógvi Hansen og Jóhan Dávur Højgaard, koma at røkja aðrar uppgávir í felagnum, og fara tí úr starvsnevndini – tí mugu tveir nýggjir nevndarlimir veljast.

Møti fjøllment
B68

B68 dagurin, er fyri alla bygdina. Ung sum gomul. Tí hevur felagið valt eina skrá, ið kemur flestum fólkum í Nes Kommunu við. B68 hevur fingið endurreist hendan dagin og HEILSA er høvuðsevnið á degnum.

Tiltakið verður 18.august leygardagin og verður í ár sett av Kristian Poulsen, Formanni í Ungdómsnevndini.

Byrjað verður í ár við KONDI BINGO, sum kemur at vara í umleið ½ tíma. Fyri at vera við í kondi bingo keypur ein sær eina ella fleiri plátur. Ein gonguruta er gjørd á økinum rundan um Svangaskarð. Tølini fyri at vinna, eru á hesið rutu, og vinnast kan við 1 rekkju, 2 rekkjur ella fullaplátu. 24 vinningar eru tilsamans.

Tiltakið heldur fram á niðaravølli á Svangaskarið, har telt og ymiskur aktivitetir vera settir upp. Vit hava lánt framkomin mátingartól frá fólkaheilsuráðinum, so møguleiki verður at máta blóðtryst, feittprosent, vøddamassa, blóðsukur og lungnaorku. Aftur í ár standa lokalir sjúkrarøktafrøðingar fyri mátinginum.

Á sjálvum vøllinum koma at vera hoppiborgir og onnur spøl til børnini. Hartil verður eisini 6-8 fótbóltsgolf banar. Sum nakað NÝTT verður “BAGAGURÚMS LOPPEMARKANÐUR”. Tú kemur við bilinum og leigar tær eitt borð, so kanst tú selja alt tað tú vilt. Bagagurúms loppemarknaður er nógv brúkt í Danmark og hildu vit tað vera spennandi at prøva til B68 DAGIN.

Góðar tónleika framførslur vera eisini. Fyrst frá Inga Poulsen. Ingi hevur akkurát framført á Summar Festivalinum. Aftaná kemur okkara lokali Jóan Jákup Benjaminsen at syngja nakrar sangir.

Sjálvandi fara vit aftur í ár at grilla pylsur og breyð 

Tað hevði verið stuttligt, at sæð nógv fólk á Svangaskarði

Koyr á B68

B68 hevði í dag seinnapartin vitjan av TB/FCS/Royn á Svangaskarði. Dysturin skuldi eftir ætlan verða leiktur í Suðri leygardagin, men vegna Summarfestivalin býttu liðini um heimavøll, so at dysturin kundi leikast á Toftum í dag í staðin. Tað vil so samstundis siga, at í 23. umfari skal B68 til Suðuroyar at leika í staðin. Hetta var 18. Umfar, har B68 við einum sigri, kundi leggja seg á tað eina uppflytingarplássið, eftir at KÍ vann á NSÍ í gjár. Fótbóltslíkindi vóru eisini góð, tá Bent Tommy Linklett bríkslaði dystin í gongd, men ikki so nógv fólk at síggja kring vøllin.

Frá seinasta dysti vóru tvær broytingar á B68 liðinum, har Sveinur Justinussen og Esmar Clementsen byrjaðu inni hesaferð. Petur í Túni Petersen, sum undan dystinum hevði leikt allar dystirnar, hevði í dag leikbann, og fyri hann á høgra bakki leikti Pedro Tarancon Anton. Hóast Suðuroyingar eru aftast í 1. Deild, var hetta kortini ikki nakað, sum kundi síggja frá fyrsta bríksl. B68 var leikliga omaná, men suðuroyingar stóðu væl og stríddust eisini væl, har B68 ikki veruliga megnaði at set teir undir eitt støðugt trýst. Suðuroyingarnir bitu eisini frá sær, har teir vóru sera vandamiklir uppá snarálopini, og ta einu ferðina, raktu teir stongina. B68 hevði eisini fleiri góðar kjansir, men tá ið kjansirnir uppstóðu, rakti man ikki málið. Tað varð tí við 0-0 í hálvleikinum.

Frá byrjan í seinna hálvleiki, varð Albert Róin Johannesen skiftir inn á vinstra bakk, meðan Óli Højgaard Olsen varð fluttur longur fram á vøllin. Stutt seinni var eisini Ottor Reinert Petersesen skiftir inn, og nú kom eisini meiri ferð á hjá B68. Tá so eitt korter var leikt, royndi Esmar Clementsen seg við langskoti, sum málverjin hálvbjargaði. Óli Højgaard Olsen var kvikur á returinum og skoraði til 1-0 B68, og stórur lætti hjá bæði leikarum og áskoðarum. B68 helt á fram við at trýsta og fleiri ferðir var heilt nær við, men inn vildi bólturin ikki. Suðuroyingar royndu seg uppá snarálop, og tað var eisini líka við ta einu ferðina, men Petur Meinhard Magnussen kom væl út úr málinum.

Tá so dysturin var um at verða liðugur, royndi Jann Ingi Petersen seg við góðum skoti, har hann rakti tvørtræið, og á returinum skoraði Otto Reinert Petersen til 2-0 til B68. Líta løtu seinni var Óli Højgaard Olsen enn einaferð uppá spæl, og skoraði úr spískum, til endaliga úrslitið 3-0 til B68. Hóast tað var ein heldur rótutur dystur, gjørdist tað kortini talan um greiða 3-0 sigur til B68, sum nú liggur nr. 3 við tveimum stigum fleiri enn NSÍ, og júst hesi bæði liðini hittast á Svangaskarði komandi vikuskifti.

Koyr á B68

Kappingin er nú farin í gongd aftur eftir summarfrítíðina, har B68 hevði vitjan av oddaliðinum KÍ. Hjá B68 vóru nakrar broytingar í mun til tað vit sóu í fyrru hálvu, har m.a. Jóhan Dávur Højgaard og Albert Róin Johannesen vóru í álopinum, meðan Esmar Clementsen og Sveinur Justinussen sótu á bonkinum. KÍ liðið var sera væl manna við fleiri leikarum, sum hava drúgvar royndir í Betrideildini, m.a. leikti Jóannes Bjartalíð allan dystin. Annars var tað frálíkt fótbóltsveður og fitt av áskoðararum, tá Rúni Olsen bríkslaði dystin í gongd.

Tað byrjaði heldur varliga, har B68 ikki veruliga megnaði at seta KÍ undir eitt støðugt trýst. Tá so eitt gott korter var leikt av dystinum, var KÍ í álopi í vinstru síðu, har spælt varð útfrá til Óla Poulsen, sum ótarnaður slapp at skjóta bóltin í málið til 1-0 til KÍ. Málskjúttin hjá KÍ leikar vanligt við besta liðinum hjá KÍ, men í dag var hann at finna í 1. Deild. B68 royndi at svara aftur, men tað gekk ikki væl at koma fram til vandamikil álop, og tá tað gjørdist vandamikið, hevði linjuverjin flaggið á lofti fyri rangstøðu. KÍ var kanska nærri enn B68 at fáa mál, men tað varð við 0-1 tá farið var til hálvleik.

Í hálvleikinum vóru Esmar Clementsen og Sveinur Justinussen skiftir inn og B68 setti eisini beinanvegin á dystin, har tað eisini vóru fleiri spentar støður frammanfyri KÍ málið. Men so hendir tað, sum ikki skal henda, tá B68 hevur fingið fatur á dystinum, og eftir eina verjuvillu verður Eivindur Sørensen hjá KÍ spældur fríur, og hann skorar trygt til 2-0 til KÍ. Trýstið, sum B68 hevði havt á KÍ var nú burtur, har tað eisini var langt ímillum B68 álopini.

B68 leikararnir royndu kortini at koma afturíaftur, og tá 10 minuttir vóru eftir at leika, var Esmar Clementsen sendur avstað, og komin fram í KÍ brotsteigin verða beinini tikin undan honum av KÍ málverjanum, Meinhard Joensen. Dómarin ivaðist ikki og dømdi brotsspark til B68, sum Jann Ingi Petersen skoraði trygt uppá. Hóast 10 minuttir vóru eftir at leika, megnaði B68 ongantíð at seta KÍ undir eitt støðugt trýst, har dómarin eisini legði 5 minuttir afturat. Tá 4 minuttir vóru leiktir av yvirtíðini, sendur Jann Ingi Petersen ein seinasta bólt fram í KÍ brotsteigin. Sveinur Justinussen fær fatur á bóltinum uttarlaga í brotsteiginum, vendur sær á og spælir tvørtur um, har indskiftið Otto Reinert Petersen er fyrstur á bóltin og skorar til 2-2, og stór frøði á bæði leikarum og viðhaldsfólki. Leikt var ikki leingi afturat og dómarin bríkslaði fyri seinastu ferð, har øll, sum halda við B68 eiga at verða nøgd við javnleikin hóast alt.

Við javnleikinum er B68 framvegis nr. 4, men nú er bara eitt stig upp til NSÍ, sum tapti ímóti ÍF. Komandi dystur hjá B68 verður komandi vikuskiftið, har leiðin gongur til Suðuroyar.

Hagtøl frá dystinum kunnu síggjast við at trýsta á slóðina niðanfyri.

http://www.faroesoccer.com/match.php?matchID=18457&pid=50

Koyr á B68

Ragnar Lindholm hevur verið ein drúgvur leikari í besta liðinum tey seinastu árini, men hevur verið uttanlanda í lestrarørindum seinasta hálvárið.
Nú er hann so komin heim aftur, og hevur skriva undir sáttmála restina av árinum.

Vælafturkomin Ragnar, og bestu eydnu!

Koyr á B68!

Vit eru glað at kunna tykkum at, André Olsen skal venja kvinnurnar.

André er vælkendur í felagnum. Hann er skrásettur fyri 213 dystir og 27 mál í reyðu blusini.

Hann kemur at venja Betri deild kvinnum og U18 gentur, og byrjar 1. august 2018.

Vit vilja ynskja Andra hjartaliga tillukku og bestu eydnu við venjara starvinum.

Koyr á B68!

Í samband við, at tað HM er á skránni í Russlandi, hava vit her á heimasíðuni spurt nakrar persónar kring B68, sum hava eitt ella annað tilknýti til okkurt av londunum, sum eru við í HM nakrar spurningar, sum sjálvandi hava nakað við HM at gera.

Á Toftum búgva tveir tannáringar, sum í hesum døgum eisini eru raktir av HM fepri, har teir fylgja sera spentir við í sjónvarpinum. Richard Højgaard De Franca og Dominick Philbrow Troleis, sum báðir leika við U15 dreingjum hjá B68, hava tað í felag, at teir eru hálvir brasilianarar, umframt at teir eisini eru góðir vinir.. Richard hevur ættarbond úr Rio De Janeiro, har familjan hjá honum eru stórir fjepparar av liðnum Flamengo. Hinvegin hevur Dominick síni ættarbond nakað uttanfyri Sao Paulo, sum er fólkaríkasti býurin í Brasil. Familjan hjá Dominick eru stórir fjepparar av Sao Paulo liðnum Corinthians.

Teir báðir hava góðar vónir, at tað skal eydnast Brasil at vinna HM, hóast tað ikki hevur hilnast so gott hjá teimum higartil. Favoritt leikarin hjá teimum er Neymar, men teir eru tó samdir, at enn hevur Neymar ikki víst tað stóra, har tað hevur verið alt for nógv fjas frá hansara síðu. Teir meta báðir, at tað eru fleiri lið um boðið hesaferð at vinna HM, tí fleiri lið hava víst góðan fótbólt og stóra styrki. Dominick metir at Belgia og Ongland eru størsta hóttanin hjá Brasil at vinna HM, meðan Richard metir tað verða Frakland. Annars halda teir báðir, at Ronaldo hevur verið tann besti leikarin í HM higartil, men teir meta kortini ikki, at Portugal megnar at vinna HM.

Í kvøld leikar Brasil avgerandi dystin í bólkaspælinum ímóti Serbia, men tann dystin kunnu teir báðir ikki síggja, tí U15 dreingir hjá B68 leika í Gundadali ímóti HB a samstundis.

Herfrá ynskja vit Dominick og Richardi góðan eydnu í kvøld, bæði við B68 og Brasil.

Koyr á B68