Category: Tíðindi

Hóskvøldið 29. februar kl. 17:30 fara vit, at hava ein limadag og kl. 19:30 byrjar felags foreldrafund uppi á Svangaskarði.

Limadagur kl. 17:30 – 19:20

Vit vita, at nógv fólk, bæði her á staðnum og aðrastaðni, hava stóran áhuga fyri B68, og tí ynskja vit at økja limatali munandi.
Tí kunnu øll, ið ynskja at vera limir í felagnum, koma niðan og avgreiða sítt limagjald hendan dagin. Uttan limir, onki felag.

Limagjaldi er 300 kr. fyri hvørt ár.

Á skránni verður:
– Suppa, kaffi og kaka
– Møðuleiki at tekna seg sum lim
– Møguligt at keypa árskort
– Kunning um limagjaldið
– Betri deildar liði venur hetta kvøldið, so tað ber til at fylgja við har
– Jákup á Borg kemur at greiða frá pre season og hvat málið er fyri 2024.
– Nýggja leikaradraktin verður avdúka.
– Handilin hjá Reyða Pantarinum verður opin

Um tað ikki ber til at koma til limadagin, er tað eisini møguligt at MELDA SEG TIL HER

Trekt verður lut, ímillum allar limirnar, um eitt árskort til allar heimadystirnar hjá B68 í Betri Deildini 2024.

Felags foreldrafundur kl. 19:30

Á fundinum kemur okkara høvuðsungdómsvenjari, Rasmus, at greiða frá komandi fótbóltsárinum hjá okkara børnum og ungdómi. Eisini fer hann at greiða frá sínum leikluti í felagnum. Rasmus fer eisini at koma inn á, hvussu foreldrini kunnu hjálpa til at venja, og hvussu venjarauppgávurnar kunnu býtast soleiðis, at tað verður ein lættari uppgáva at átaka sær. 

Eisini kemur hann at greiða frá nýggja fótbóltskúlanum Svangaskarð Camp.

Vit vóna at síggja nógv fólk uppi á Svangaskarði hetta kvøldið.

Koyr á B68!

Aðalfundurin ið skuldi verða mikukvøldið 31. januar, er útsettur til fríggjakvøldið 2. februar kl. 20:00.

Koyr á B68

Mánadagin 15. januar 2024 frá kl. 16:00 til kl. 20:00 verður árligi luttøkudagurin hjá B68 á Svangaskarði.

Øll ið ynskja at spæla fótbólt við B68 í ár, kunnu melda seg til og gjalda luttøkugjald.
Við í luttøkugjaldinum fær hvør leikari eitt sett av spæliklæðum til ognar, har navn og nummar verður prentað á bakið.

Á luttøkudegnum ber til at passa spæliklæðini, so at øll kunnu fáa røttu stødd.
Tá klæðini eru komin, kunnu tey avheintast á Svangaskarði.

Luttøkugjaldið fyri fótbóltsárið 2024 er 800 kr.

Tað skal vera stuttligt at spæla fótbólt við B68, og fótbóltur skal vera fyri øll.
Vit vóna at síggja so nógv børn og vaksin sum gjørligt til luttøkudagin.

Til ber at nýta frítíðarkortið frá Nes Kommunu til luttøkudagin.
Frítíðarkortið er galdandi fyri øll børn frá 0 – 18 ár.

Kaffi og okkurt gott afturvið verður sjálvandi eisini at fáa.

Koyr á B68!

Mikudagin 31. januar kl. 20.00 er aðalfundur á miðhæddini á Svangaskarði.

Skrá sambart viðtøkum.

Kaka, kaffi og te verður at fáa.

Koyr á B68

Her eber til at taka ein pdf niður við sangunum Reyði pantarin fer at syngja til steypafinaluna

Gjárakvøldið var eykaaðalfundur hjá Tofta ítróttarfelag.
Einasta mál á skrá var nevndarval. Í nevnd komu: 

Formaður: Høgni Petersen 
Næstformaður: Eyðun Petersen
Peningarøkil: Jóhan Dávur Højgaard
Skrivari: Niclas Allan Danielsen
Ungdómsábyrgdari: Rógvi Hansen
Nevndarlimur: Filip Johannesen

Tiltakslimir eru Heini Mikkelsen og Andras Magnussen.

Koyr á B68!

Nýggjur høvuðsungdómsvenjari settur.

Rasmus Darre Haahr verður nýggi høvuðsungdómsvenjarin hjá B68.

B68 hevur gjørt avtalu við 32 ára gamla danan Rasmus Darre Haahr. Rasmus byrjar í starvinum sum høvuðsungdómsvenjari tann 15. apríl. 

Rasmus hevur UEFA A venjaraprógvið umframt ein BA í Ítrótti frá Københavns Universitet.

Rasmus kemur beint úr Keypmannahavn har hann dagliga lesur til lærara umframt at hann røkir eitt venjarastarv í HB Køge. Tvey tey komandi árini, verður hetta tó skift út við nýggjar avbjóðingar á Svangaskarði, sum hann gleðir seg nógv til.

Aðalfundur felagsins var hildin á Svangaskarði í gjárkvøldið.
Greitt varð frá virksemi felagsins farna árið og roknskapur var lagdur fram.
Felagið kann gleðast um, at áhugin fyri fótbólti á Toftum gerst stórri og stórri. Bæði í ár eins í undanfarna ár hevur tilmeldingin av luttakandi limum verið methøg og eisini er at gleðast um at stig vóru tikin til at hava kvinnufótbólt í vaksnamannadeildini í 2023.

Kostnaðarmikið at vera í ovastu rók

Roknskapurin fyri 2022 ið var lagdur fram vísti eitt rakstrarhall uppá kr. 800.000,-. Bróðurparturin av hallinum stóðst í stóran mun av avsetingum og óvæntaðum útreiðslum og tiltøkum fyri at varðveita sæti í fremstu røð í føroyskum fótbólti og hetta eydnaðist eisini til fulnar.

Hallið kemur ikki at ávirka raksturin í 2023

Búskettið fyri 2023 verður eitt vet hægri enn í 2022. Hetta kemst serliga av, at vit í ár fara at hava lið í bestu og næstbestu mansdeildini umframt at kvinnufótbólturin eisini er settur á stovn aftur.

Stór tiltøk eru sett í verk fyri at fáa stuttfreistaðu og útistandandi skuld burtur og áðrenn aðalfundin var meginparturin av skuldini burtur. Felagið verður skuldarfrítt í vár áðrenn fari verður inní summarið.

Fyri at tryggjað raksturin fer felagið at umleggja nøkur partaprøv til pening fyri at fáa alla skuld burtur umframt at felagið hevur eina sera arbeiðssama stuðulsnevnd sum hevur tví- til trífaldað stuðulsinntøkurnar fyri 2023.

Í takt við at tað leggjast fleiri og fleiri sjálvbodnar hendur afturat felagnum, ber eisini til í ár at seta fleiri tiltøk í verk sum vóru á skrá í fjør, men sum ikki kundu haldast vegna væntandi hendur.

Eisini verður køkurin á Svangaskarði dagførdur í verandi løtu og gevur hetta okkum fleir inntøkumøguleikar enn undanfarin ár.

Tað verður ikki mett at felagið í so stóran mun fer at hava líka stórar óvæntaðar útreiðslur komadi árið eins og í fjør og saman við øktu inntøkunum verður mett at felagið kemur skuldarfrítt og við einum hampuligum yvirskotið út úr 2023.

Eftir endaspælið í VFF cup gjár endaði B68 á einum 5. plássið.

B68 tók í móti AB í Gundadali í gjár og tað var ongantíð nakar ivi um hvønn veg dysturin fór. Vit fingu dystin til høldar við einum sannførandi 3-0 sigri.
Málini skutu:

1-0 Aidan Liu (Upplegg: Jørgen Nielsen)

2-0 Villiam Klein (Upplegg: Jørgen Nielsen)

3-0 Áki Johannesen (Upplegg: Hjarnar J. Johansen)

Liðið hjá B68: Benjamin Schubert – Gilli Samuelsen, Áki Johannesen, Aidan Liu, Hjalti Strømsten – Alex Mellemgaard, Ragnar Samuelsen, Sebastian L. Nielsen – Mohamed Samba, Jørgen Nielsen, Villiam Klein

Seinni komu hesir inn: Aleksandur Ólavsson, Jónas Warner, Fríði í T. Petersen, Hanus Højgaard, Hjarnar J. Johansen og Aron R. Hansen

Dystirnir í VFF cup endaði soleiðis:

B68 1 – 3 KÍ
B68 0 – 3 HB
EB/STR 1 – 2 B68
B68 1 – 1 07V
NSÍ 1 – 2 B68
Finaluumfar:
B68 3 – 0 AB

B68 kurvin er ein facebookbólkur ætlaður B68-fjepparum at lata, býta um ella selja B68 klæðir og aðra fótbóltsútgerð sínamillum. Eisini fer felagið í jøvnum millumbilum at leggja myndir út av gloymdum klæðum á Svangaskarði út á bólkin, við vón um, at onkur av foreldrunum kenna klæðini aftur.

Av tí at børn okkara vaksa skjótari enn vit ofta geva okkum far um, eru gaggurnar sera ofta so gott sum óslitnar áðrenn tær eru ov lítlar. Tí er ætlanin at hava eina endurnýtslu “gagguskipan” ella eitt “gagguskáp á Svangaskarði. – Hetta merkir, at tá barnið er vaksið úr gaggunum, kunnu gaggurnar, sum fravegis kunnu brúkast í langa tíð afturat, setast í gagguskápið og man kann finna sær eitt annað passandi par av gaggum púra ókeypis.

Sí facebook bólkin: https://www.facebook.com/groups/864277738166269