Category: Tíðindi

Vit eru sera fegin at kunna kunngera, at gamli kenningurin Aleksandar Jovevic er settur sum høvuðsvenjari hjá besta liðnum.

Aleksandar er ikki ókendur í B68 — hann hevur áður verið her í 2018, 2020 og 2021 sum hjálparvenjari, og var ein týðandi partur av toyminum, sum fekk felagið aftur í Betri Deildina.

Seinasta árið hevur hann roynt seg uttanlands, har hann hevur havt eitt spennandi starv í Barein hjá felagnum Ali CSC.

“Eftir at hava verið í Barein, eri eg ótrúliga glaður at vera aftur í B68. Eg hevði nøkur góð ár her, tá vit fluttu upp í 2020, og eg bleiv sera góður við bæði felagið og fólkini her. Tá eg fór tá, føldi eg, at hetta ikki var tann seinasti kapittulin hjá mær í B68. Nú eri eg aftur – og eg eri bæði glaður og spentur upp á hesa avbjóðingina. Good to be back home.”

Koyr á B68!

Vit kunnu nú kunngerða, at okkara eftir hondini lokali maður, Pedro, verður fysiskur venjari hjá besta liðnum.

Pedro sigur heilt stutt, at hann er sera spentur, og at hann tekur uppgávuna á seg við stórari ábyrgd!

Talan er um ein 2 ára sáttmála.

Hjartaliga tillukku Pedro!
Vit síggja fram til eitt sterkt samstarv!💪⚽

B68 fær nýggjan ungdómsvenjara – Kevin André Madsen úr Noregi.

Vit fegnast um at kunna boða frá, at Kevin André Madsen verður ungdómsvenjari hjá B68 frá 1. januar 2026.

Kevin er 28 ára gamal og kemur úr Noregi. Hann byrjaði sum hjálparvenjari, tá hann var einans 15 ára gamal, við D11-liðnum heima í Noregi. Síðani 2019 hevur hann verið venjari fyri ymisk lið, og hevur hann royndir frá feløgunum Frøya (barndómsfelagið), Træff, Bryne, Frøyland og Sandnes Ulf.

Seinastu tvey árini hevur Kevin arbeitt fulla tíð sum ítróttarstjóri fyri barns- og ungdómsdeildina hjá Sandnes Ulf.

Nú flytir hann til Føroyar fyri at gerast partur av felagnum hjá okkum. Kevin kennir væl til føroyskan fótbólt – hann hevur fylgt landsliðnum síðan 2018 og hevur síðani 2020 verið sera áhugaður í føroyskum fótbólti, og hevur eisini lært seg at tosa føroykst av tí sama.

Vit eru fegin at hava fingi Kevin til felagið og eru sannførd um, at hansara royndir og orka fara at styrkja arbeiðið við okkara ungu leikarum.

Vælkomin til Toftir, Kevin!

Koyr á B68!

Í kvøld var eykaaðalfundur hjá B68 á Svangaskarði.
Sambært viðtøkum felagsins var eittans mál á skrá, – nevndarval.

Allir nevndarlimirnir stillaðu uppaftur og vóru ongin onnur uppskot.
Sostatt heldur verandi nevnd fram.

Eftir aðalfundin skipaði nevndin seg á sama hátt sum áðrenn.

Nevndin er soleiðis manna:
Formaður: Jóhannus Danielsen
Varaformaður: Jann Ingi Petersen
Peningarøkil: Trúgvi Reinert Kjeld
Skrivari: Niclas Allan Danielsen
Ungdómsábyrgdari: Johnleif Gerðisá
Nevndarlimur: Rasmus Reinert Zachhau

Tiltakslimir: Meinhard Fróði Højgaard og Niclas F. Davidsen

Koyr á B68

Í sambandi við at Kristina Hansen fer uttanlanda í lestrarørindum, gevst hon sum samskipari hjá B68.

Fróði Johannesen verður nýggjur samskipari. Fróði, sum júst er heimkomin eftir loknan lestur, hevur verið samskipari hjá B68 áður.

B68 takkar Kristinu fyri gott arbeiði og góða eydnu við lestrinum og ynskir Fróða væl afturkomnum.

Lýst verður til eykaaðalfund týsdagin 2. september 2025, kl. 20:00

Einasta mál á skránni er:

1) Val av nevnd.

Kaffi og køkur vera at fáa.

Starvsnevndin

Vit eru fegin at kunna boða frá, at ungdómsnevndin hjá B68 nú er sett. Í nevndini sita:

Julia Tarancón Clementsen
Halgerð Árnadóttir Johannessen
Bárður Kjeld

Vit gleða okkum at síggja teirra arbeiði fyri ungdómin í felagnum!

Koyr á B68!

Leygardagin 15. mars verður Niclas Allan Danielsen 50 ár. 

Niclas Allan býr í Rituvík, men er toftamaður við stóra T og hevur eitt stórt B68 hjarta. Gjøgnum árini hevur hann lagt nógva arbeiðsorku og tíð í felagsarbeiði hjá B68 á ymiskan hátt, m.a. sum leikari, venjari og nevndarlimur.

Niclan Allan hevur sitið í B68 nevndini síðani 2015, har hann hevur gjørt eitt stórt arbeiði, m.a. við at skipað fyri ymiskum inntøkugevandi tiltøkum. Øll árini Niclas Allan hevur verið í nevndini, hevur hann skipað fyri fýrverkssøluni hjá B68. 

Vit í Tofta ítróttafelag takka Niclas Allan fyri hansara stóra arbeiði í felagnum og ynskja honum hjartaliga til lukku og alt tað besta framyvir.

Niclas Allan heldur føðingardagin á Svangaskarði kl. 17.00 og øll eru hjartaliga vælkomin.

Seinnapartin varð sáttmáli undirskrivaður millum Nes kommunu og Føroya Møblasølu um nýggjan graslíkisvøll á Svangaskarði. Fyri Nes kommunu undirskrivaði Súni í Hjøllum, borgarstjóri, meðan Birgir Andreasen undirskrivaði fyri Føroya Møblasølu.

Nýggi vøllurin hevur korkfyllu eins og vit kenna tað frá vøllunum í m.a. Klaksvík, Sørvági og í Gøtu. Við at velja korkfyllu hevur Nes kommuna eisini hugsað um tað umhvørvisliga.

Føroya Møblasøla syrgir fyri veitingini, áleggingini og tí, sum hartil hoyrir. Harafturat er avtalað eitt árligt eftirlit.

Nes kommuna skal fyriskipa at taka gamla vøllin av og burturbeina hann.

Núverandi graslíki á ovara vølli á Svangaskarði er frá 2012 og nógv slitið.

Í eina tíð hevur miðvíst verið  arbeitt  við at gera fyrireikingar. Sports Lab og aðrir ráðgevar hava hjálpt til í tilgongdini. Eisini hevur umsitingin verið í samband við fleiri aðrar kommunur og nógv fólk, sum hava royndir og kunnleika til vallarrøkt til tess at fáa greinað, hvussu aðrir vøllir hava roynst.

Nes kommuna  bað um tilboð uppá nýtt graslíki við tilhoyrandi stoytdoyvingarlagi frá tveimum veitarum.

Á býráðsfundi, tann 24. februar, varð einmælt samtykt, eftur eftir tilmæli frá teknisku nevnd og fíggjarnevndini, at taka av tilboðnum frá Føroya Møblasølu/Domo Sports v. Birgir Andreasen.

Avtalað er, at nýggi vøllurin verður lagdur á í tíðarskeiðinum 16. -30. juni.

Um mánaðarskiftið mai/juni verður farið at taka gamla vøllin av og gera aðrar neyðugar fyrireikingar.

Á myndinini frá vinstru: Odmar Færø, sølumaður, Súni í Hjøllum, borgarstjóri og Birgir Andreasen, stjóri í Føroya Møblasølu.

Í morgun varð arbeiðstakarasáttmáli undirskrivaður millum byggivirkið KBH og Nes kommunu um bygging av nýggjum áskoðarskýli á Svangaskarði báðumegin verandi bygning. Pláss verður fyri meira enn 300  sitandi áskoðarum. Aftan fyri  áskoðaraplássini verður eisini ein breiður plattur.

Nes kommuna tók av lægsta tilboðnum uppá verkætlanin, sum var frá KBH. Súni í Hjøllum, borgarstjóri, undirskrivaði fyri Nes kommunu, meðan Helgi Johannesen, stjóri, undirskrivaði fyri KBH.

Miðjað verður ímóti at hava helmingin av skýlinum liðugt í summar, meðan seinni parturin verður liðugur til heystar.

Sandavágs Timburhandil fer at veita stálkonstruktiónina. Teknistovan í Gøtu og Spenn hava staðið fyri projekteringini. Fyri Nes kommunu verður tað Teknistovan í Gøtu, sum fer at hava byggileiðsluna og eftirlitið.

Á myndini frá vinstru: Karl Johannesen frá KBH, Súni í Hjøllum, borgarstjóri, Helgi Johannesen frá KBH og Anfinn í Toft, tekniskur leiðari í Nes kommunu

Kelda: https://nes.fo/byggja-nytt-askodaraskyli-a-svangaskardi/?c=tidindir&fbclid=IwY2xjawIr8KpleHRuA2FlbQIxMQABHR_EQRmgTmtvufnJ77ow7Dg-9u1uwtzhg1cQqYWYy5MZjKRNUvJuIBQzCQ_aem_g7DZpH83449sU88jDcY-3A